काठमाडौँ- हिन्दुहरूको महान पर्व दशैँकोलागि मुस्ताङबाट ल्याएका भेडा-च्याङ्ग्रा भक्तपुरको सल्लाघारीमा ल्याइएका छन् ।
यो वर्षको दशैँको लागि मुस्ताङबाट खरिद गरेर भेडाच्याङ्ग्रा ल्याएको व्यापारीहरूले बताएका छन् ।
भक्तपुरमा व्यापारीहरूले प्रतिकेजी १३ सय रुपैयाँमा जिउँदो च्याङ्ग्रा बिक्री गरिरहेका छन् । मुस्ताङबाट काठमाडौँसम्म ल्याउँदा विभिन्न स्थानमा स्थानीय निकायहरूले कर लिने गरेकाले पनि लागत बढ्दै गएको व्यापारी चित्र बहादुर सिलवालले जानकारी दिए । सल्लाघारीमा रहेका भेडा र च्याङ्ग्रालाई पशु चिकित्सकले चेकजाच गरेपछि मात्रै बिक्रि गर्ने गरिएको उनले बताए ।
पशु सेवा विभागले आश्विन ६ गतेदेखि १५ गतेसम्म सल्लाघारीमा नै पशुपन्छीको स्वास्थ्य परिक्षण गर्ने व्यवस्था मिलाएको छ । खाद्य संस्थानले भने यस बर्ष खसि बोका च्याङ्ग्राको बिक्रीवितरण नगर्ने जनाएको छ ।
