काठमाडौँ- सिन्धुपाल्चोकको भोटेकोसी गाउँपालिका-२ स्थित तातोपानी नाका सहज बनाउन चीनले चासो देखाएको छ । चीनको झाङ्मुमा बसेको सीमा सुरक्षा बैठकमा चीनले नाका व्यवस्थापन, सीमा अपराध नियन्त्रण, व्यापारिक गतिविधि र आपसी सम्बन्ध सुदृढीकरणमा चासो देखाएको हो ।
तातोपानी नाकामा निर्यात भने अझै ठप्प जस्तै छ । वैशाख १८ मा केही कन्टेनरबाट सामग्री पठाइए पनि त्यसपछि कुनै निर्यात हुन सकेको छैन।
बैठकमा चीनले यसअघि रसुवाबाट २०५ नेपालीको उद्धार गरेको भन्दै नेपालले धन्यवाद ज्ञापन गरेको छ।
बैठकमा नेपालतर्फका प्रमुख जिल्ला अधिकारी किरण थापा, सुरक्षाकर्मी, भन्सार तथा अध्यागमन अधिकारी सहभागी थिए । बैठकमा नेपालले विपद् व्यवस्थापन, चाडपर्वका लागि कन्टेनर बढाउने र निर्यात प्राथमिकताको माग राखेको थियो ।
बैठकमा चीनको तर्फबाट न्यालमका उच्च अधिकारी सहभागी थिए ।
