काठमाडौँ- नेकपा एमाले बागमती प्रदेश कमिटी सदस्य ईश्वरीप्रसाद श्रेष्ठ नेतृत्वमा करिब दुई दर्जन एमाले कार्यकर्ताहरू नेकपा माओवादी केन्द्रमा प्रवेश गरेका छन् ।
सिन्धुपाल्चोकका पूराना नेता श्रेष्ठसहित बिहीबार माओवादी केन्द्रीय कार्यालय पेरिसडाँडामा २० जना एमाले कार्यकर्ताहरू माओवादीमा प्रवेश गरेका हुन् ।
उनीहरूलाई माओवादी अध्यक्ष पुष्पकमल दाहाल प्रचण्डको प्रमुख आतिथ्यमा भित्र्याउने तयारी थियो । तर प्रचण्ड विराटनगर गएपछि माओवादी उपाध्यक्ष अग्निप्रसाद सापकोटाको प्रमुख आतिथ्यमा कार्यक्रम भएको हो ।
एमालेको बागमती प्रदेश कमिटी सदस्य श्रेष्ठ, पूर्व वडा अध्यक्ष एवं प्रदेश कमिटी सदस्य विष्णु लामा, जिल्ला कमिटी सदस्य कमरेड सिताराम गिरी, मेख बहादुर न्यौपाने, रमेश श्रेष्ठलगायत प्रवेश गरेका हुन् ।
लामा र गिरी नेकपा एमाले र माओवादी एकता टुटेपछि माओवादीबाट एमालेमा गएका थिए ।
