काठमाडौँ- अनेरास्ववियु सिन्धुपाल्चोकले प्रमुख जिल्ला अधिकारी बन्धु प्रसाद बास्तोलालाई आज ज्ञापनपत्र बुझाएको छ ।
सिन्धुपाल्चोकमा सञ्चालनमा रहेका यातायात व्यवसायीहरूले विद्यार्थी, जेष्ठ नागरिक, शारीरिक रूपमा अशक्त तथा अपाङ्ग भएका नागरिकलाई कानुनले व्यवस्था गरेको ४५ प्रतिशत भाडामा सहुलियत कार्यान्वयनमा नआएको भन्दै ज्ञापनपत्र मार्फत ध्यानाकर्षण गरेको छ ।
त्यस्तै अरनिको यातायातले सुकुटेदेखि बाह्रबिसेसम्म क्याम्पस टिप सञ्चालन गर्ने प्रतिबद्धता कार्यान्वयनमा नआएको भन्दै ध्यानाकर्षण गरेको छ ।
निजी विद्यालयहरूले नियमअनुसार प्रदान गर्नपर्ने छात्रावृत्ति प्रदान गर्न र शिक्षकहरूलाई सरकारले तोकेको न्यूनतम सेवा सुविधा प्रदान गराउनको लागी नियमित निरीक्षण गर्न पनि अनुरोध गरेको छ ।
वर्षादको समयमा भैपरी आउने विपद् तथा जोखिमबाट क्षति कम गर्नका निमित्त र उद्दार तथा राहत उपलब्ध गराउनका लागि (quick special response team) तयार गर्न अनुरोध गरेको ज्ञापनपत्रमा लेखिएको छ ।
नदी दोहनको कारणले खोला आसपासका वस्तीहरूमा बाढीलगायतका समस्या आइपरेको स्पस्ट रहेको भन्दै नियम विपरित भइरहेको नदी दोहन निरीक्षण गरेर कारबाहीको दायरामा ल्याउन माग गरेको संगठनका इन्चार्ज चरि बहादुर तामाङले बताए ।
पछिल्लो समय तामाङले इञ्चार्ज सम्हालेपछि अनेरास्ववियुले गति लिन थालेको छ । अनेरास्ववियुले जिल्लामा संगठन सुदृढीकरण अभियान सञ्चालन गर्दै आएको छ । विगतमा तेस्रो स्थानमा रहेको संगठन यसपटकको स्ववियु निर्वाचनबाट पहिलो संगठन बनेको छ । शैक्षिक संस्थामा प्रारम्भिक कमिटी गठन पुर्नगठन बैठक भेला प्रशिक्षण गरिरहेको छ ।
