काठमाडौँ- प्रहरीले गुण्डागर्दीमा संलग्नहरूलाई पक्राउ गरेको छ । ठमेल र महाराजगन्ज क्षेत्रबाट गुण्डागर्दीमा संलग्नहरू ४७ जनालाई पक्राउ गरेको हो ।
पक्राउ पर्नेमा गुन्डा नाइके चक्रे मिलन (मिलन गुरुङ) पनि छन् । महाराजगन्जस्थित होटल साम्बालामा जन्मदिन मनाउन पुगेका चक्रेलाई जिल्ला प्रहरी परिसर काठमाडौँ र उपत्यका अपराध अनुसन्धान कार्यालयको टोलीले त्यहिँबाट समातेको हो ।
चक्रे यसअघि पनि पक्राउ परेर छुटेका हुन् । उनी २०७४ वैशाख २६ मा पनि महाराजगन्जबाट पक्राउ परेर छुटेका थिए ।
त्यस्तै प्रहरीले ठमेलको दोहोरी साँझबाट युवराज गुरुङ उर्फ सानुभाइलाई पक्राउ गरेको थियो । सानुभाइ प्रहरी इन्काउन्टरमा मारिएका कुमार श्रेष्ठ ‘घैँटे’का सहयोगी हुन् ।
रेष्टुरेण्ट र रात्रि क्लबमा बसेर झैझगडा गर्ने र हप्ता असुल्ने गरेको गुनासो आएपछि प्रहरीले अप्रेसन चलाएको हो ।
