काठमाडौँ- त्रिभुवन विश्वविद्यालयमा अनेरास्ववियू (क्रान्तिकारी)ले ३४ दिनपछि आन्दोलन स्थगित गरेको छ । त्रिभुवन विश्वविद्यालय र अनेरास्ववियू (क्रान्तिकारी) त्रि.वि. जिल्ला समितिबीच मंगलबार शुल्क घटाउने सहमतिपछि आन्दोलन स्थगित भएको हो । ३४ दिनको लगातार आन्दोलनपछि अनेरास्ववियू (क्रान्तिकारी)ले सफलता हात पारेको हो ।
मानविकी तथा सामाजिक शास्त्र सङ्काय अन्तर्गतका अन्तर्राष्ट्रिय सम्बन्ध तथा कूटनीति, लैङ्गिक अध्ययन, सामाजिक कार्य र द्वन्द्व, शान्ति तथा विकास अध्ययन विभागको शुल्क घटाउने सहमति भएको हो ।
सहमति अनुसार यी विभागहरूको शुल्क घटाएर अब रु. १ लाख १० हजार कायम गरिनेछ । यसअघि १ लाख ८० हजार रूपैयाँ शुल्क थियो । उक्त व्यवस्था तत्काल दोस्रो सेमेस्टरदेखि लागू हुनेछ ।
