काठमाडौँ– नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले आफ्नो र पार्टीप्रति जनताको बुझाइ पहिलेको जस्तो नभएको बताएका छन् ।
शनिबार पार्टीको दलित मुक्ति मोर्चाले काठमाडौंमा गरेको एक कार्यक्रममा बोल्दै उनले प्रचण्ड भनेपछि पहिले मानिसहरूको दिमागमा आउने चित्र र अहिलेमा फरक रहेको बताएका हुन् ।
‘हिजो जनयुद्ध गरेर शान्ति प्रक्रियामा आउँदा संगठन त त्यति ठूलो होइन । तर राप थियो, ताप थियो, वाइसीएल थियो, सेना थियो । क्यान्टेनमेन्ट भए पनि बन्दुक नै थियो । म चुनावमा भोट हाल्न जाँदा जनमुक्ति सेनाका दुई वटा गाडी अघिपछि राखेर भोट हाल्न जाने त्यो बेलाको प्रचण्ड भनेपछि मान्छेले कस्तो बुझ्थ्यो भन्नुस् त । अहिले त …..छैन,’ उनले भने ।
यद्यपि फेरि जनमुक्ति सेना बनाउनुपर्ने भनाइ आफ्नो नरहेको पनि उनले बताए।
तर पार्टीलाई पहिलेको जस्तै शक्तिशाली बनाउनुपर्ने उनले बताए ।
त्यसका लागि पार्टी एकढिक्का भएर सडकमा जानुपर्ने अध्यक्ष प्रचण्डले बताए ।
अध्यक्ष प्रचण्डले ऐन र प्राधिकरण बनाएर मात्रै दलितहरूको अधिकार सुनिश्चित नहुने बताए ।
‘हामी आन्दोलनमा जाने हो । बरु अब एक पटक फेरि जेल, नेल, यातना खान पनि तयार हुने अब । नत्र सजिलै माथिबाट नियम बनाइदिने नेताहरुले, सदनबाट बल गरेर दलित ऐन बनाइदिने, प्राधिकरण बनइदिने अनि मुक्ति पाइन्छ भन्न थालियो भने अधिकार पाइँदैन । हामीलाई शक्ति चाहिन्छ,’ उनले भने।
चाडपर्व सकिएपछि सडकलाई नै मुख्य रुपमा प्रयोग गरेर अघि बढ्ने पनि उनले बताए ।
